Ev alqı-satqısı zamanı dələduzluq hallarına tez-tez rast gəlinir. Bəzən bir ev bir neçə insana satılır və ev sahibləri əllərində ödədikləri vəsait haqda çek və ya digər sənəd olmadığı üçün son dərəcə çətin vəziyyətə düşürlər. Belə halların yaşanmaması üçün qanunvericiliklə müəyyən edilmiş qayda mövcuddur.

Azərbaycan Respublikası Baş Prokurorluğu #hüquqimaarifləndirmə heştəqi altında hazırladığı növbəti maarifləndirici materialında MMC və MTK-lar tərəfindən inşa edilən binadan mənzil alarkən ödəniş hansı qaydada edilməli olduğu haqda məlumat verib.

Məhdud Məsuliyyətli Cəmiyyətlər (MMC) və Mənzil-tikinti kooperativləri (MTK) tərəfindən tikilən binadan mənzil alarkən vətəndaşlara nağd qaydada hər hansı bir ödəniş etməkdən imtina etmək, vəsaitin nəzərdə tutulan tikinti şirkəti və ya MTK-nın bank hesabına köçürmək tövsiyə olunur.

Belə ki, “Nağdsız hesablaşmalar haqqında” Qanuna əsasən, daşınmaz əmlakın alqı-satqısı üzrə, mənzil-tikinti kooperativinin üzvünün pay haqqı üzrə və bina tikintisi fəaliyyəti ilə məşğul olan şəxslərdən yaşayış və qeyri-yaşayış sahələrinin alınması ilə bağlı həyata keçirilən ödənişlər yalnız nağdsız qaydada həyata keçirilməlidir.