Bir çoxlarınız göbələkdən hazırlanan krem-şorbanın dadına bir dəfədə olsun baxmısınız. Baxmamısınızsa mütləq baxın, çünki qaydası ilə hazırladıqda, inanılmaz dadlıdır. Lakin elə insanlar var ki, göbələkdən hazırlanan istənilən xörəyi yeməkdən çəkinirlər, zəhərlənməkdən qorxurlar, halbuki müasir zəmanədə bu nadir halda baş verə bilər. Aşağıda göbələkdən zəhərlənmənin səbəblərini sadalayacağıq.

Göbələk zəhərlənməsinin qarşısını almaq üçün göbələklərin tanınması, toplanması, daşınması, saxlanması, emalı texnologiyasına ciddi riayət etmək tövsiyə olunur.

Bu gün artıq iri supermarket şəbəkələrində nəzarətdən keçmiş təzə məhsullar satılır, ona görə də göbələkdən zəhərlənmə ehtimalı çox azdır.

Göbələkdən zəhərlənmənin səbəbləri

Göbələyi meşədə özünüz yığmısınızsa və ya onu əldən alırsınızsa, aşağıda göstərilən amillərə diqqət etməlisiniz və zəhərlənmənin əsas səbəblərini nəzərə almalısınız:

– tanış olmayan və şübhəli olan göbələklərin yığılması;

– yol kənarında, sənaye müəssisələrinin yaxınlığında, radioaktivliyin yüksək olduğu yerlərdə göbələklərin yığılması;

– qurdlu və ya çürük, köhnə göbələklərin yığılması;

– aşağı keyfiyyətli qablaşdırmadan istifadə;

– göbələk yığarkən şəxsi gigiyena qaydalarına əməl edilməməsi;

– emal olunmamış məhsulun uzunmüddətli (üç saatdan çox) saxlanması;

– köhnəlmiş göbələklərin qidada istifadəsi;

– göbələklərin spirtli içkilərlə birlikdə istehlakı.

Göbələkdən zəhərlənmə təhlükəsi məhsulu emal etməklə tamamilə aradan qaldırılmır. Konservləşdirilmiş göbələklər qapalı qabda uzun müddət saxlandıqda botulizmə səbəb ola bilər. Konservləşdirmə texnologiyasına riayət olunmalı və yeməyin hazırlandığı otağın gigiyenasına nəzarət edilməlidir. Kortəbii, bazarlarda və ya keyfiyyət sertifikatı olmayan hazır konservləşdirilmiş göbələk istehlak edilməməlidir.

Göbələkdən zəhərlənmənin əlamətləri

Göbələkdən zəhərlənmənin əlamətləri onların növünə, hazırlanması və istehlak xüsusiyyətlərinə, alınan toksin miqdarına görə dəyişir və aşağıdakı əlamətlərlə özünü büruzə edir:

• ilk simptomlar zəhərin bədənə daxil olmasından yarım saat sonra başlayır
• mədə ağrısı, ürəkbulanma və qusma, ishal, artan bədən hərarəti, titrəmə hissi.

Göbələklərdən zəhərlənməyə ilk şübhə yarandığı halda, dərhal həkimə müraciət etmək lazımdır.