“Google” şirkəti “Search” (Axtarış) və “Lens” (Obyektiv) funksiyalarında əhəmiyyətli yenilənmələr təqdim edib.

Belə ki, yeni funksiyalar STEAM (Science, Technology, Engineering and Mathematics) fənləri üzrə mürəkkəb məsələlərin həllində şagird-tələbələrə köməyə istiqamətlənib və riyazi məsələlərin həllində geniş kömək təklif edir.

İstifadəçilərə axtarış xanasına tənliyi yazmaq və ya “Google Lens”in köməyi ilə məsələnin şəklini çəkmək kifayətdir. Nəticədə onlar mərhələli şəkildə həlli tapacaqlar. “Riyazi hesablama” funksiyası fərdi kompüterlərdə artıq təqdim edilir və tezliklə mobil cihazlarda da ondan istifadə imkanı yaradılacaq.

“Google”, həmçinin, “Search”da STEM konsepsiyasının vizual şəkildə öyrənilməsi funksiyasını tətbiq edib. Bu funksiya istifadəçilərə biologiya, kimya, fizika, astronomiya və s. ilə bağlı mindən çox mövzu üzrə 3D modelli və interaktiv diaqramlarla qarşılıqlı əlaqədə olmaq imkanı verir.

“Google” nümayəndələri ümid edirlər ki, insanlar yeni və təkmilləşdirilmiş funksiyalar sayəsində öz maraqlarını təmin edəcək və xeyli yeni məlumat öyrənəcəklər.