Azərbaycan Prezidenti İlham Əliyev “Azərbaycan Respublikasının 2024-cü il dövlət büdcəsi haqqında” Qanun layihəsini Azərbaycan Respublikasının Milli Məclisin müzakirəsinə təqdim edib.

TIME rəsmi mənbəyə istinadən bildirir ki, qanun layihəsi ilə aşağıdakı linkdə tanış ola bilərsiniz:

“Azərbaycan Respublikasının 2024-cü il dövlət büdcəsi haqqında” Qanun layihəsi

Layihəyə əsasən 2024-cü il Azəbaycanda dövlət büdcəsində məktəbəqədər təhsil xərcləri artırılır.

Gələn il məktəbəqədər təhsil xərcləri 453 018 349 manat təşkil edəcək. Bu göstərici 2023-cü ilin təsdiq olunmuş proqnozu ilə müqayisədə 11.9% və ya 48 182 248 manat çoxdur.

Qeyd edək ki, 2023-cü ilin təsdiq edilmiş dövlət büdcəsində məktəbəqədər təhsil xərcləri 404 836 101 manat proqnozlaşdırılıb.

Eyni zamanda, televiziya, radio və nəşriyyat xərclərinin artırılması nəzərdə tutulur.

Layihəyə əsasən, gələn il televiziya, radio və nəşriyyat xərcləri 67 589 813 manat təşkil edəcək. Bu göstərici 2023-cü ilin təsdiq olunmuş proqnozu ilə müqayisədə 10.8% və ya 6,565,700 manat çoxdur.

Azərbaycanda dövlət büdcəsi xərclərinin 231,5 milyon manatı və yaxud 0,6 %-i xəstəxanalarla bağlı xərclərin payına düşəcək.

Məlumata görə, bu, ötən ilin təsdiq olunmuş proqnozu ilə müqayisədə 35,1 % çoxdur. Xəstəxanalara xərcləmələr səhiyyə xərclərinin 12,4 %-ni təşkil edəcək.

2024-cü ildə Azərbaycanda dövlət büdcəsi xərclərinin 528 milyon manatı və yaxud 1,4%-i nəqliyyat və rabitə ilə bağlı xərclərinin payına düşəcək.

Məlumata görə, bu, 2023-cü ilin təsdiq olunmuş proqnozu ilə müqayisədə 57,6% çoxdur.

Nəqliyyat və rabitə xərcləri iqtisadi fəaliyyət xərclərinin 6,8%-ni təşkil edəcək.

Xatırladaq ki, gələn il büdcə gəlirlərinin 34 milyard 173 milyon manat, büdcə xərclərinin isə 36 milyard 763 milyon manat olacağı gözlənilir.