Təhsil Nazirliyinin “Təhsil Masası” proqramının növbəti mövzusu “Tərbiyəçi-müəllimə peşəkar inkişaf lazımdırmı?” olub.

TIME rəsmi mənbəyə istinadən bildirir ki, mövzu ilə bağlı sualların cavabını və açıqlamaları məktəbəqədər təhsilin təşkili və idarə olunması sektorunun müdiri İlahə Rəsulova təqdim edib

Nazirliyin rəsmisi hazırda məktəbəqədər təhsilə əlçatanlığın artırılması üçün fərqli modellər üzərində işlərin aparıldığını qeyd edib.

O bildirib ki, bəzi bağçalarda sıxlıq müşahidə olunur: “Bu problemin aradan qaldırılması üçün həm beynəlxalq təşkilatlar vasitəsilə, həm komanda olaraq çalışırıq. Dünyada bir çox uğurlu modellər var. Lakin harada hansı modelin tətbiqinin uğurlu olacağı ilə bağlı ciddi təhlil aparılmalıdır”, – deyə o əlavə edib.

Paytaxtda bəzi bağçalarda növbələrin olduğuna baxmayaraq elə bağçalarda var ki, orada boş yerlər çoxdur. Burada tələb və təklif rol oynayır.

Sektor müdiri onuda qeyd edib ki, məktəbdən fərqli olaraq valideyn övladını evin yanındakı bağçaya aparmağa məcbur deyil. İstədiyi 3 bağçanı seçərək növbəyə yazıla bilər.

“Elm və Təhsil Nazirliyi olaraq bu mövzuda işlər aparırıq. Dünyada bununla bağlı bir çox uğurlu modellər var. Lakin hansı qəsəbədə, hansı rayonda modellərin uğurlu aparılması üçün təhlil aparılmalıdır”, – deyə İlahə Rəsulova bildirib.

Bağçalarda uşaqların qidalanması məsələlərinə nəzər salaraq İ. Rəsulova 196 bağçada pilot qida layihəsinin tətbiq olunduğunu bildirib.

O qeyd edib ki, hazırda bununla bağlı valideynlərdən və layihənin tətbiq olunduğu bağçaların rəhbərliyindən toplanan sorğular emal edilir.

“Bundan sonra qərar veriləcək ki, layihə genişləndirilsin, yoxsa dayandırılsın və ya modifikasiya edilsin. Pilot qida layihəsinin tətbiq olunmadığı bağçalarda qanunvericiliyə uyğun olaraq xüsusi menyu var və uşaqların qidalanması buna uyğun olaraq tənzimlənir.

Lakin 5-10 il əvvəlki uşaqlar həm fiziki, həm də qidalanma baxımından bugünkü uşaqlardan fərqlənir. Bunun üçün də bu sahədə islahatlara başlanılıb ki, vahid menyu tərtib edilsin”, – deyə o bildirib.

Nazirliyin rəsmisi onuda deyib ki, gələcəkdə bağçalarda iş strukturu dəyişdirilə bilər, bununla bağlı aidiyyəti qurumlara təkliflər hazırlanır.

“Digər ölkələrin bağçalarında bir tərbiyəçi-müəllim və onun köməkçisi olur. Bizdə isə hələlik belə bir şey yoxdur. Amma bizdə də bu istiqamətdə islahatlara ehtiyac ola bilər. Bunun üçün qanunvericiliyə dəyişiklik edilməlidir”, – deyə o əlavə edib.