Bakıda keçirilən 2-ci Milli Kibertəhlükəsizlik Forumu çərçivəsində “Kritik İnformasiya infrastrukturunun təhlükəsizliyi” mövzusunda panel sessiyada bir sıra prioritet məsələ müzakirə olunub.

TIME rəsmi mənbəyə istinadən bildirir ki, panel müzakirələrdə kibertəhlükəsizlik sahəsində savadlı kadrların az olması diqqətə catdırılıb və kibertəhlükəsizliyin təmin edilməsi sahəsində müxtəlif ölkələrdə hansı tədbirlərin görüldüyü haqda məlumat mübadiləsi aparılıb.

Bildirilib ki, Qazaxıstanda kibertəhlükəsizlik sahəsində kadrların hazırlanması məqsədi ilə 1,5 milyon dollar qrant ayrılıb. Ölkədə kadr çatışmamazlığı nəticəsində kritik informasiya infrastrukturunun yaradılmasına imkan vermir. Ekspertlərin sözlərinə görə bu problemin çözülməsi məqsədi ilə kibertəhlükəsizlik sahəsi üzrə maarifkəndirməyə təhsil sistemində xüsusi diqqət yetirilməlidir.

Özbəkistanda gənc nəslin kibertəhlükəsizlik üzrə savadlılığını artırmaq məqsədi ilə Kibertəhlükəsizlik klubları yaradılır və burada məktəblilər təcrübələrini paylaşaraq sahə üzrə biliklərini artırırlar.

Bununla yanaşı, ölkələr arasında kibertəhdidlər ilə bağlı təcrübə mübadiləsinə ehtiyac olduğu qeyd edildi, çünki kibercinayətkarlar yeni texnologiyalardan və üsullardan istifadə edirlər və bu proses sürətli şəkildə davam edir.

Kibertəhlükəsizliyin təmin edilməsi məqsədi ilə bu sahədə qanunvericiliyin daim təkmilləşdirilməsinə, mövcud olan qanunların real işləməsinə diqqət yetirmək, yeni tərtib edilən informasiya sistemlərini və proqram təminatlarını tədbiq etmədən öncə müvafiq qurumlar tərəfindən nəzarətdən keçirmək vacibdir.

Eyni zamanda, kibertəhdidləri təhlil etmək üçün ekspertlər kiberinsident baş verdiyi zaman və ondan sonra operativ məlumatların toplanaraq təqdim edilməsinə ehtiyac olduğunu qeyd ediblər.

Panel muzakirələrdə, Azərbaycanda vahid qaynar xəttin yaradılması təklif olunub.

Bununla yanaşı, yeni bank, maliyyə və sığorta xidmətlərinin kibertəhlükəsizliyinin təmin edilməsi istiqamətində genişmiqyaslı tədbirlərin gorülməsi nəzərdə tutulur. Bu tədbirlər çərçivəsində, Mərkəzi Bank “Cyber İnshurance” xidmətinin siğorta bazarına çıxarmağa hazırlaşır.

“Kiberinsidentlərdən sığortalanma məhsulu bazara gətirilməsi artıq gündəmdədir və yaxın zamanda təqdim ediləcək”,- deyə Dövlət Təhlükəsizliyi Xidmətinin Kibertəhlükəsizlik Mərkəzinin rəhbəri Davud Rüstəmov qeyd edib.

Müzakirələr zamanı, kritik informasiya infrastrukturunun yaradılması layihələrində iştirak edən mütəxəssislərin Azərbaycan vətəndaşı olması və istifadə edilən məhsulların bir qisminin yerli istehsal olması şərti bu sahədə canlanmaya səbəb olacağı qeyd edilib.

Ekspertlər yaxın zamanda bu sahədə vakant yerlərin sayının artacağını və savadlı kadrlara ehtiyac duyulacağını proqnozlaşdırırlar.