2023-cü ildə icbari tibbi sığorta üzrə xidmətlər zərfində dəyişiklik edilməsi nəzərdə tutulur.

TIME bildirir ki, İcbari Tibbi Sığorta üzrə Dövlət Agentliyinin direktoru Zaur Əliyev noyabrın 10-da Milli Məclisin İctimai birliklər və dini qurumlar, Elm və təhsil, Ailə, qadın və uşaq məsələləri, Səhiyyə, Mədəniyyət komitələrinin birgə iclasında 2023-cü ilin dövlət büdcəsinin müzakirələri zamanı onuda qeyd edib ki, növbəti il orqan köçürmələri, ürək və damar çatışmazlığı üzrə əməliyyatlar və digər əməliyyatların icbari tibbi sığorta xidmətləri zərfinə daxil edilməsi və həmin əməliyyatlar üzrə say limitinin artırılması nəzərdə tutulur.

“Yeni xidmətlər zərfi aidiyyəti qurumlarla razılaşdırılıb və gözləyirik ki, təsdiqlənsin. Hazırda həmçinin 92 özəl tibb müəssisəsi ilə müqavilə imzalamışıq və xəstələri həmin özəl tibb müəssisələrinə də göndəririk”, – deyə o qeyd edib.

Parlamentin səhiyyə komitəsinin sədri Əhliman Əmiraslanov müzakirələr zamanı deyib ki, zərfdə yer alması lazım olan xəstəliklərdən biri də məhz onkoloji xəstələrin müalicə məsələsidir.

“Zaur müəllim bayaq çıxışında onlar üçün ayrılan təxminən 200 milyon manatdan artıq vəsaitə qənaət etdiklərini qeyd etdi. Növbəti ilin dövlət büdcəsində onkoloji xəstəliklərin müalicəsi üçün ayrılan vəsaitin məbləği olduqca aşağıdır. Bu vəsaitin artırılmasını təklif edirəm.

Müzakirələr zamanı da onkoloji xəstələrin icbari tibbi sığorta ilə əhatə olunmasına təqribən elə 200 milyon manat vəsaitin lazım olduğunu vurğulayıblar. Fürsətdən istifadə edərək Maliyyə Nazirliyindən xahiş edirəm ki, onkoloji xəstəliyin hökmən icbari tibbi sığorta ilə əhatə olunmasına öz köməkliyinizi göstərəsiniz. Çünki bilirik ki, həmin xəstəlikdən əziyyət çəkənlər nə qədər pul xərcləyirlər”, – deyə o qeyd edib.

Xatırladaq ki, Azərbaycan Respublikasının 2023-cü il dövlət büdcəsi haqqında” qanun layihəsində 2023-cü il üçün dövlət büdcəsinin gəlirləri 30,7 milyard manat proqnozlaşdırılır ki, bu da ölkə tarixinin ən yüksək göstəricisi olmaqla, 2022-ci illə müqayisədə 5,2 faiz, 2021-ci illə müqayisədə isə 16,4 faiz çoxdur.