Ümumilikdə müəllimlərin 78 faizi sertifikasiyada uğurlu nəticə əldə edib.

TIME rəsmi mənbəyə istinadən bildirir ki, elm və təhsil naziri Emin Əmrullayev Bakı şəhəri təhsil işçilərinin Sentyabr konfransında çıxışı zamanı qeyd edib ki, 2978 müəllim sertifikasiyanın ilk mərhələsində yüksək nəticə əldə edib.

“1530 müəllim sertifikasiyanın ilkin mərhələsində 21-29 bal toplayıb. Bu müəllimlərə bir il ərzində təkmilləşdirmə kurslarına cəlb edilərək, dəstək veriləcək”, – nazir çıxışında bildirib.

Müəllimlərin sertfifikasiyasından bəhs edərək nazir deyib ki, müəllim sertfifikasiyanın ikinci mərhələsində uğur qazanmasa və ya üzrsüz səbəbdən iştirak etməzsə, əmək müqaviləsinə xitam veriləcək.

Nazir qeyd edib ki, yeni tədris ili başlayana qədər müəllimlərin sertifikasiya imtahanının müsahibə mərhələsinin keçirilməsi planlaşdırılır, artıq müsahibə komissiyaları yaradılıb.

“Müsahibə bəzi müəllimlərlə ənənəvi, bəziləri ilə isə onlayn formatda olacaq. Çalışacağıq ki, müəllimlər bu ay əlavələrini ala bilsin” – deyə o əlavə edib.

E. Əmrullayevin sözlərinə əsasən, 469 müəllim, yəni sertifikasiyada iştirak edənlərin 18 faizi, “anbar”, “şənbə” və “pambıq” sözləri verilmiş test tapşırığında sözün düzgün yazılışını tapa bilməyib.

Nazir müəllimlərin sözləri səhf yazmaları məsələsinə aydınlıq gətirib: “Bu, hələ ilkin nəticələrdir, niyə baş verməsi araşdırılmalıdır. Yəqin ki, müxtəlif səbəblər olacaq. Əminəm ki, əsas səbəb imtahanlar ilk dəfə keçirildiyindən yaranan həyəcan olub. Gördüyümüz odur ki, imtahan mərhələsində minimal balı toplayan müəllimlərin yarısından çoxu 25-28 bal toplayıb. Hansısa 2-3 bal həmin müəllimlərin uğur əldə etməsinə mane olub. Əminəm ki, bu aradan qaldırılabiləcək məsələdir. Bilirik ki, zəif nəticə göstərən müəllimlərin üçün növbəti il də sertifikasiya imtahanı keçiriləcək. Onlar üçün təşkil ediləcək təkmilləşdirmə kursları kömək olacaq, həm həyacanları dəf edə biləcəklər, həm də lazım olan 3-5 balı toplayacaqlar. Müəllim ikinci mərhələdə uğur qazanmasa və üzrsüz səbəbdən iştirak etməsə onların əmək müqaviləsinə xitam vermək məcburiyyətində qalacağıq. Bu qanunvericiliyin tələbidir”,- deyə nazir bildirib.