Dövlət İmtahan Mərkəzinin Direktorlar Şurasının sədri Məleykə Abbaszadə ixtisas seçimi edəcək abituriyentlərə diqqət yetirməli olduqları məsələlər haqqında məlumat verib.

TIME rəsmi mənbəyə istinadən bildirir ki, V ixtisas qrupunda qabiliyyət tələb edən ixtisaslar üzrə 3924 plan yeri ayrılıb. Qabiliyyət imtahanından məqbul qiymət alan abituriyentlərin sayı isə 8921 nəfərdir.

IV ixtisas qrupu üzrə ayrılmış 3980 plan yerinin təqribən 66%-i (2635 yer) dövlət sifarişlidir, 350 baldan yuxarı nəticə göstərənlərin dövlət sifarişli yerlərə qəbul olmaq şansı var.

III ixtisas qrupu üzrə ayrılmış 15157 plan yerinin 4593 yeri dövlət sifarişlidir. Yüksək bal toplayanların sayı bu il ötən ilə nisbətən daha azdır. Yüksək reytinqli ixtisaslarda ötən illə müqayisədə bir qədər aşağı keçid balları formalaşa bilər.

II ixtisas qrupu üzrə ayrılmış 12232 plan yerinin 4040 yeri dövlət sifarişlidir. Bu qrup üzrə ayrılmış 12232 plan yerinə qarşı cəmi 9804 müsabiqə iştirakçısı var. II ixtisas qrupu üzrə hər kəsin ali təhsil müəssisələrinə qəbul olmaq şansı var. 280 baldan yuxarı nəticə göstərənlərin dövlət sifarişli yerlərə qəbul olmaq şansı var.

I ixtisas qrupu üzrə qyrılmış 16419 plan yerinin 66%-i (10785 yer) dövlət sifarişlidir. 200 baldan yuxarı nəticə göstərən hər kəsin ali təhsil müəssisələrinə qəbul olmaq şansı var. 300 və daha yuxarı bal toplayanların isə dövlət sifarişli yerlərə qəbul olmaq şansı var.

Bu il 600 və daha yuxarı bal toplayanların sayı 1082 nəfərdir. Ötən il bu rəqəm 640 nəfər idi. Bu il 500-ən yuxarı bal toplayanların sayı ötən ilkindən 1000 nəfər çoxdur – 2953 nəfərdir. Yüksək reytinqli ixtisasların keçid balının ötən ilə nisbətən qalxma ehtimalı var.

Subbakalavrların qəbul olma şansı daha çox II qrupdadır, digər qruplarda plan yerlərinin sayı buna imkan vermir.