Dövlət İmtahan Mərkəzi (DİM) yaxın günlərdə rəsmi internet saytında informatika fənni üzrə imtahan modelini paylaşacaq.

TIME rəsmi mənbəyə istinadən bildirir ki, informatika fənni üzrə işçi qrupunun iclası keçirilib və gündəlik məsələ informatika fənni üzrə ali təhsil müəssisələrinə qəbul imtahanı modelinin müzakirəsi olub.

DİM-in şöbə müdiri Afiqə Batıyeva iclasda bildirib ki, artıq informatika fənnindən qəbul imtahanı proqramının DİM-in rəsmi internet saytında yerləşdirilib və təqdim olunan imtahan modelinin bu proqrama uyğun hazırlanıb.

Sonra Gömrük Komitəsinin Akademiyasının müəllimi İsmayıl Sadıqov imtahan modelini iştirakçılara təqdim edərək, modeldə alqoritimləşdirmə, proqramlaşdırma və məntiqi düşünməyə əsaslanan tapşırıqlara üstünlük verildiyini qeyd edib.

Müzakirədə Azərbaycan İnternet Forumunun prezidenti Osman Gündüz, Azərbaycan Dillər Universitetinin İnformasiya texnologiyaları kafedrasının müdiri Fikrət İbiyev, Azərbaycan Tibb Universitetinin mühəndis-proqramçısı Zaur Hacıyev,  Azərbaycan Universitetinin Riyaziyyat və İnformatika kafedrasının müdiri Qabil Əliyev, Bakı Dövlət Universitetinin müəllimi Anar Rəşidov fikir bildirib, təkliflər veriblər. Qeyd olunan fikir və təkliflər modeldə nəzərə alınıb.

Beləliklə, imtahan modelinin müzakirəsi başa çatıb. İmtahan modeli yaxın günlərdə DİM-in rəsmi internet saytında yerləşdiriləcək.

İşçi qrupunun növbəti iclası 17 yanvar 2022-ci il tarixində olacaq.