Azərbaycan Qida Təhlükəsizliyi Agentliyi rəsmi Facebook səhifəsində ictimaiyyəti maraqlandıran sualları cavablandırıb.

TIME bildirir ki, müsahibə zamanı pandemiya şəraitində mehmanxanalarda, eləcə də kafe və restoranlarda xidmətin təşkili ilə bağlı həyata keçirilən nəzarət tədbirləri ilə əlaqədar məsələlərlə bağlı suallara AQTA sədrinin müşaviri Elxan Mikayılov aydınlıq gətirib.

İctimaiyyəti pandemiya dövründə ən çox maraqlandıran suallardan biri toyların keçirilməsinə nə vaxt icazə veriləcək və icazə verilsə onlar hansı şəraitdə keçiriləcək.

Elxan Mikayılov deyib ki, toyların keçirilməsinə icazə verilsə bu, ən yüksək riski olan sahələrdən biri olacaq, çünki eyni anda bir məkana çox sayda adam yığışacaq.

O qeyd edib ki, toyların keçirilməsinə icazə verildiyi halda pandemiya dövründə şadlıq saraylarının fəaliyyətinin necə təşkil olunması ilə bağlı tənzimləyici normalar müəyyənləşdiriləcək və nəzarət tədbirləri həyata keçiriləcək.

“Toylar şadlıq saraylarında təşkil olunduğuna görə onlar da ictimai iaşə obyektinin bir növü sayılır və bu səbəbdən AQTA tərəfindən onlara nəzarət edilir. Əksər şadlıq saraylarının restoran fəaliyyəti var, yəni vətəndaşlara restoran kimi də xidmət göstərirlər. Kafesi, restoranı olan şadlıq sarayları artıq nəzarətin mahiyyəti və nəzarət olunan məsələlərlə yaxından tanışdır. Bu, imkan verəcək ki, toylara icazə verildiyi halda şadlıq saraylarında həmin tələblər daha rahat yerinə yetirilsin. Bununla bağlı metodiki təlimatlarımız da var, dövrü olaraq şadlıq sarayları ilə də görüşlər təşkil olunur”.

AQTA rəsmisi əlavə edib ki, toyların keçirilməsinə icazə verildiyi halda bütün şadlıq sarayları ilə əvvəlcədən metodiki təlimatlar üzrə və Nazirlər Kabinetinin müvafiq qərarları ilə bağlı maarifləndirmə tədbirləri həyata keçiriləcək.

Yas mərasimlərinə icazə verilməsinin riskləri haqda bəhs edərək Elxan Mikayılov qeyd edib ki, bu mərasimlərin bir çox hallarda qohumların görüş yeri olduğu üçün, onlar sıx təmasda olurlar, bu isə yoluxma ehtimalını toyla müqayisədə yüksəldir, çünki toylarda bir masa arxasında bir ailə üzvləri və ya bir-birini tanımayan insanlar olur, onların arasında isə sıx təmas olmur.

Koronavirusa yoluxma statistikasında kəskin artım baş verərsə və bu, idarəolunmaz səviyyəyə çatarsa, obyektlərin fəaliyyəti ilə bağlı müəyyən məhdudlaşdırma tədbirləri keçirilə bilər.

Pandemiya ilə əlaqədar sahibkarların mövcud təlimatlara əməl etməyəcəyi halda, ictimai iaşə obyektlərinin bağlana biləcəyi ilə bağlı fikrə münasibət bildirərkən E.Mikayılov deyib ki, bütün dünya ölkələri kimi, Azərbaycan da pandemiya ilə mübarizədə yeni təcrübələr əldə edir.

“Yeni təcrübələr imkan verir ki, məsələ daha az məhdudlaşmaya getməklə tənzimlənsin. Hazırda əsas məsələ fiziki məsafənin qorunması, fərdi gigiyena qaydalarına əməl edilmə, tibbi maskadan istifadə edilmədir. Bunlara əməl edilsə, yoluxma sayı da azala bilər. Amma sözsüz ki, bu məsələ ilə bağlı əsas qərarı Nazirlər Kabineti yanında Operativ Qərargah verir”.